BioNutriBread: тұрақты тамақтану үшін нан-тоқаш өнімдерінің тағамдық құндылығын арттыру

«Агрономия және орман шаруашылығы» кафедрасында доцент Кантарбаева Э.Е. мен «Биотехнология» білім беру бағдарламасының 2 курс магистранты Нуралина Г. магистрлік диссертация тақырыбы аясындағы ғылыми-зерттеу жұмысы негізінде өндірілген ноқат дәндерін пайдалану арқылы тағамдық және биологиялық құндылығы жоғары нан өндіру технологиясын әзірледі. Аталған әзірлеме тағам сапасын жақсартуға және күнделікті тұтынатын өнімдерде өсімдік ақуызын пайдалануды кеңейтуге бағытталған.

Өндірілген ноқат ақуыздың, алмастырылмайтын аминқышқылдарының, тағамдық талшықтардың, витаминдер мен биологиялық белсенді заттардың көзі болып табылады, бұл нанның тағамдық және биологиялық құндылығын арттырып, дұрыс әрі тұрақты тамақтануға арналған функционалдық өнім жасауға мүмкіндік береді.

Зерттеу нәтижелері бойынша өндірілген ноқат дәндерін қосу арқылы нанның тағамдық және биологиялық құндылығын арттыру тәсілі әзірленіп, оған патент алынды. Сонымен қатар әзірленген өнімнің сапасы мен тағамдық құндылығына зертханалық зерттеулер жүргізіліп, аталған технологияны тағам өнеркәсібіне енгізудің перспективалылығы дәлелденді.