Қозыбаев университетінде академиктің 95 жылдығына арналған кеш өтті

Университет мұражайында көрнекті ғалым, академик Манаш Қозыбаевтың 95 жылдық мерейтойына орай «Манаш Қозыбаев – тұғыры биік тарлан тарихшы» атты әдеби-сазды кеш ұйымдастырылды.

ЖОО тарихы 1937 жылдан бастау алып, 2003 жылы ерекше маңызға ие болды. Дәл осы жылы оқу орнына тарих ғылымдарының докторы, Қазақстан Ұлттық ғылым академиясының академигі, мемлекет және қоғам қайраткері Манаш Қозыбаевтың есімі берілді.

Салтанатты шараға ғалымдар, студенттер және «Sana» әдеби-музыкалық клубының мүшелері қатысты. Олар ұлы тарихшының рухани мұрасын дәріптеп, оның өмірі мен еңбегін ұлықтады.

«Біз Қозыбаев университетімен тығыз шығармашылық байланыс құрып келеміз. Негізгі мақсатымыз – қазақ әдебиеті мен өнер қайраткерлерінің мұрасын насихаттау. Бүгінде Манаш Қозыбаевтың еңбектері жас буын үшін аса құнды», – деді «Sana» әдеби-музыкалық клубының жетекшісі Алтынай Сыздықова.

Шара барысында «Қазақ филологиясы» кафедрасының профессоры Жанар Таласпаева сөз алып, академик еңбектерінің қазіргі қазақстандық ғылым үшін маңызын атап өтті.

Академиктің мұрасы тек ғылыми еңбектер мен архивтік деректермен шектелмейді. Ол – бүгінгі ұрпақ үшін адамгершілік пен рухани бағыт-бағдардың үлгісі. Студенттер Манаш Қозыбаевтың өмірі мен шығармашылығын зерттей отырып, елге қызмет етуге және болашаққа сеніммен қарауға үйренеді.