1С: Қазақстан: Сұранысқа ие мамандарды даярлау

Университет үшін жұмыс берушілермен серіктестікті нығайту және тәжірибеге бағытталған оқыту тәсілдерін енгізу – негізгі басымдықтардың бірі. Соның айқын дәлелі ретінде «1С: Қазақстан» компаниясымен бірлесіп, сондай-ақ өңірлік бизнес өкілдерінің қолдауымен 1С бухгалтерия бойынша жаңартылған кабинет ашылды.

Университетке бухгалтерлік білім мен тәжірибені меңгеруге қажетті бағдарламалық қамтамасыз ету, құрал-жабдықтары және оқу әдебиеттері бар 15 заманауи компьютер берілді. Біздің басты мақсатымыз – еңбек нарығында сұранысқа ие, білікті мамандар даярлау. Аталған ресурстардың арқасында студенттер қосымша артықшылыққа ие болып отыр, себебі «1С» жүйесі кез келген кәсіпорында кеңінен қолданылады.

Студенттерге енді қосымша ақылы курстардан өтудің қажеті жоқ. Олар «1С» бойынша барлық қажетті білімді университет қабырғасында тегін игереді. 3–4 курс студенттері тиісті пәндерді оқып, емтихан тапсыру арқылы «1С: Кәсіби» сертификатын алады.

Университет «1С: Қазақстан» компаниясымен ұзақ жылдар бойы тығыз байланыста жұмыс істеп келеді. 2021 жылдан бері 100-ден астам студент сертификат иегері атанды. Сонымен қатар, үш оқытушымыз арнайы қайта даярлаудан өтіп, осы курсты оқыту құқығын иеленді.

«Біз материалдық-техникалық базаны жаңартып қана қоймай, кәсіби қызметтің нақты жағдайларына барынша жақын заманауи білім беру ортасын құрамыз. «1С: Қазақстан» компаниясына, сондай-ақ бизнес-серіктестерге ерекше ризашылығымды білдіргім келеді. Жаңа аудитория кәсіби құзыреттілікті қалыптастыру алаңына айналады. Бұл жоба студенттерге теориялық біліммен қатар бухгалтерлік есептің заманауи цифрлық құралдарын игеруге, сертификаттаудан өтуге және өз мансабын сенімді құруға мүмкіндік береді»,-деп атап өтті Басқарма Төрағасы-Ректор Ербол Исақаев