Университет жас стартаперлерге жол ашады

Kozybayev University Андрей Казанцев пен Даниял Абуов студенттерімен заманауи цифрлық экожүйе – MyNKU стартап-жобасы бойынша ынтымақтастық туралы келісім жасасты.

Жоба студенттер мен университет арасындағы өзара іс-қимылдың жеделдігі мен сапасын арттыруға, сондай-ақ білім беру үдерістерін цифрландыруды одан әрі дамытуға бағытталған.

MyNKU – студенттерге арналған мобильді қосымша және университет қызметкерлеріне арналған функционалды әкімші панелі. Платформа әртүрлі өтінімдерді беруден бастап деректерді басқару мен ішкі коммуникацияларға дейінгі негізгі үдерістерді автоматтандыруға мүмкіндік береді.

Жүйенің тиімділігі тәжірибеде енгізілуімен дәлелденді: MyNKU пайдалану студенттік жатақханаларға орналастыру үдерісін толық цифрландыруды қамтамасыз етті. Жүйе мыңдаған өтінімді санаулы секунд ішінде өңдеуге мүмкіндік беріп, қызметкерлерге түсетін жүктемені айтарлықтай азайтып, білім алушыларға қызмет көрсетуді жеделдетті.

Қол қойылған келісім аясында университет MyNKU платформасын басқарушылық және сервистік үдерістерде одан әрі қолдануды жоспарлап отыр, ал жоба авторлары оны Қазақстанның басқа да білім беру ұйымдарына кеңейтуді көздейді. Сонымен қатар келісімге сәйкес цифрлық өнімді әлеуетті сатып алушылардан түсетін пайда келесі үлесте бөлінеді: 10% – университетке, 90% – студент-әзірлеушілерге.

«Бұл – сіздерді ынталандыратын әділ келісім, – деді Басқарма Төрағасы – Ректор Ербол Исакаев. – MyNKU – студенттердің жеке бастамасы. Бүгінде университет стартаптар туындайтын, бастамалар жүзеге асатын және армандар орындалатын алаңға айналып келе жатқанын мақтанышпен айта аламыз».

Даниял Абуов қосымшаның құрылу тарихымен бөлісті. Оның айтуынша, бастапқыда қосымша студенттердің өмірін жеңілдету мақсатында жасалған. Андрей Казанцевпен бірге олар өміршең өнім жасап, пайдаланушылар санын шамамен 5 есеге арттырды. Студенттер ректорға жүгініп, оның қолдауына ие болды. Қазіргі таңда MyNKU қосымшасы Kozybayev University студенттерінің басым бөлігінің смартфондарына орнатылған. Студенттер университет әкімшілігіне сұрақ қойып, жедел жауап ала алады, сабақ кестесін қарап, үлгерімін тексеріп, сондай-ақ кезексіз әрі кедергісіз жатақханаға орналаса алады.

Жобаға қазақстандық бірнеше жоғары оқу орны қызығушылық танытып отыр. Бұл кейс жаңа идеяларға құштар және өз стартаптарын ұсынуға дайын басқа студенттер үшін де үлкен мотивация болады деп сенеміз. Оларды жүзеге асыру үшін университетте SKU StartUp Arena алаңы құрылған. Бұл – жастар жобалары өңір мен ел үшін нақты шешімдерге айналатын орта.