Қазақстан Республикасының Қарулы Күштері запастағы офицерлер мен сержанттармен толықты. Қозыбаев университетінің 96 студенті әскери ант қабылдады. Салтанатты шарада сарбаздарды университет басшылығы, кафедра ардагерлері, ұстаздар қауымы құттықтады. Түлектерді қолдауға олардың ата-аналары, туыстары мен достары жиналды.
25 жыл бойы әскери кафедра 3000-нан астам запастағы офицерлер мен сержанттарды дайындады. Түлектеріміз республиканың Қарулы Күштерінде, Ішкі істер министрлігінде, Ұлттық қауіпсіздік комитетінің Шекара қызметінде және басқа да құрылымдарында түрлі лауазымдарда табысты қызмет етеді. Айта кету керек, биылдың өзінде Әскери кафедраның бірінші курсына 81 адам қабылданған.
Кафедра атқыштар мамандығы бойынша бір жылдық оқумен запастағы сержанттарды, сондай-ақ жалпы әскери бөлімшелердің, бөлімдер мен құрамалардың аумақтық қорғанысты жоспарлау және ұйымдастыру бойынша офицерлерді дайындайды. Биыл 60 офицер мен 36 запастағы сержант дайындадық. Студенттер әскери-тактикалық дайындықтан, оқу-жаттығу жиындарынан өтіп, емтихандарды сәтті тапсырады. Қазір олар Қазақстанның жұмылдыру резервінің мамандары. Құттықтаймыз!
