Білім ордамызда Студенттік ассамблеясының салтанатты ашылуы өтті. Шара Қазақстан халқы Ассамблеясы хатшылығының меңгерушісі Марат Әзілханов пен «Ассамблея жастары» РҚБ төрағасы Тимур Джумурбаевтың қатысуымен өтті. «Ассамблея жастары» РҚБ Солтүстік Қазақстан облысы бойынша өкілдігінің белсенділерімен және университет студенттерімен кездесуде қонақтар елімізде бірлікті нығайту, жастар қозғалысын дамыту бағытында атқарылып жатқан бастамаларға тоқталды.
«ҚХА мүшелері бейбітшілік жаршылары. Қазіргі қоғамда түрлі ұғымдар мен дүниетанымдарға толы нұрлы, мейірімділікті сақтау өте маңызды. Сондықтан Студенттік Ассамблеяда бірлесе атқаратын істің бәрі құнды»,- деді Марат Әзілханов.
Білім алушылармен ашық сұхбат барысында жаңа студенттік тұғырнама аясында бірлікті нығайту, жастар қозғалыстарын дамыту бағытында өз ұсыныстарын айтып, жобаларымен бөлісті.
«Қазіргі таңда еліміздің түкпір-түкпірінде Студенттік ассамблеялар ашылып жатыр.Бұл бастаманың арқасында ҚХА жұмысына жаңа жастар тартылады. Жалпы, қазір республика бойынша осындай 60-қа жуық ассамблеялар ашылды»,- деп атап өтті «Ассамблея жастары» РҚБ төрағасы Тимур Джумурбаев. Студенттік ассамблеясының төрағасы болып студентіміз Көркемай Жүсіпбек атанды. Сондай-ақ, жиында белсенділер алғыс хаттармен марапатталды.
