Қозыбаев шаңырағы 10-11 сынып түлектерін Ашық есік шарасында құшақ жая қарсы алды. KU және UA қос дипломды білім беру бағдарламаларының ашық есік күніне «Парасат» мектеп-лицейі, «Бірінші гимназия» КММ ,БЭСТ , «Дарын» мектеп-лицейі» КММ, «М. Жұмабаев атындағы IT-мектеп-лицей» талапкерлері жиналды.
Алдымен концерттік бағдарлама мен би жарысында оқушылар бойларын сергітіп алды. Көп кідірмей шығармашылық тапсырмаларды орындап, Instagram желісіндегі челленджден бастады.
Екінші кезең квест ойынымен жалғасты. Интерактивті ойын белгілі бір білім беру бағдарламасына арналған 5 миссиядан құралды. Мұнда оқушылар таспа түстері бойынша командаларға бөлініп, зертаханаларда берілген тапсырмаларды орындады. Мектеп оқушылары университет профессорларымен тікелей қарым-қатынас алаңын құрып, зертханалардағы құрылғылармен танысты. Осылайша, балалар бір сәтке өздерін биотехнолог маманы, жас дәрігер, педагог ретінде сезінді. Оқушылар квест арқылы өздеріне жақын мамандықты таңдай алды. Ал DREAM TEAM студенттері әр командаға бағыт бағдар беріп, ойын барысын қадағалап отырды.
Квест соңында оқушыларды «Болашақты таңдау» алаңында Қозыбаев университетінің өкілдері қарсы алып, тікелей сұрақтарына жауап берді. Болашақ студенттер шетелге шықпай-ақ, әлемдік деңгейдегі білім алуға бірегей мүмкіндік беретін халықаралық және қос дипломды білім беру бағдарламаларымен танысты. Оқушылар университет атынан естелік сыйлықтар алды.
