Қозыбаев университетінің басшылық құрамы мен студенттері Семейдегі Шәкәрім университетінің алаңында өткен «Абайдың толық адам ілімі: ұлттық құндылықтар мен заманауи көзқарас» атты Республикалық форумына қатысты.
Аталмыш жиын ҚР Ғылым және жоғары білім министрлігінің қолдауымен ұйымдастырылып отыр.
Шараға қатысушы белсенді жастар- Абай Құнанбайұлының «Толық адам» ұстанымын қазіргі қоғаммен үндестіру, жастар тәрбиесіндегі орнын айқындау, көшбасшылық, ғылым мен мәдениетке бетбұрыс, Абайтанудың тәрбиелік мәнін талқылады.
Студенттер үшін көшбасшылық қабілеттерді нығайтуға бағытталған «Жастар – болашақ драйвері» атты TED Talks форматындағы кездесулер мен тренингтер өткізілді. TED Talks алаңында білім алушылар көшбасшылық жолындағы тәжірибелерімен бөлісіп, заманауи жастар саясатының өзекті мәселелерін көтерді. Сонымен қатар, «Shakarim Quiz» атты зияткерлік ойыны мен «Flavors & Ideas» кешкі кездесуі жастардың шығармашылық және мәдени қарым-қатынастарын дамытуға жол ашты.
Белсенді жастар Семейдегі Абайдың «Жидебай-Бөрілі» тарихи-мәдени музей-қорығы мен Жидебайдағы Абай-Шәкәрім кесенелерін аралап, тағылымды сапар жасады.
Қозыбаев университетінің атынан форумға қатысқан Әлеуметтік-мәдени даму жөніндегі Басқарма мүшесі Әділхан Төлепберген және Қозыбаев университетінің студенттік омбудсмені, студенті Лейла Берікова ҚР Ғылым және жоғары білім министрі Саясат Нұрбектің Алғыс хатымен марапатталды.
Еліміздің болашағы – жастардың қолында, ал осындай іс-шаралар ұлттық рухани құндылықтарды жаңғыртуға серпіліс береді.